Төрийн банк “Тогтвортой өсөлт, хамтын түншлэл” арга хэмжээг энэ сарын 28-ны өдөр банкны төв байранд зохион байгууллаа. Монголын ногоон барилгын хүрээлэнтэй хамтран зохион байгуулсан энэ удаагийн арга хэмжээнд барилгын эко шийдлүүдийг санал болгогч 50 гаруй компанийн төлөөлөл оролцож, салбарын хөгжил, чиг хандлага, хамтын ажиллагааны шинэ боломжуудын талаар санал солилцсон юм.
Мөн Төрийн банкнаас тогтвортой хөгжлийн үзэл баримтлал, Монгол Улс дахь тогтвортой санхүүжилтийн өнөөгийн байдал, банкнаас энэ чиглэлд баримталж буй бодлого, үйл ажиллагаа болон бүтээгдэхүүн, үйлчилгээнийхээ талаарх мэдээллийг бизнес эрхлэгчдэд танилцууллаа.
Тухайлбал, ногоон бизнесийн зээл болон ногоон орон сууцны зээлийн мэдээллийг бизнес эрхлэгчдэд танилцуулсан нь ногоон барилгын салбарынханд чухал ач холбогдолтой байсныг Монголын ногоон барилгын хүрээлэнгээс онцолж байв.
Мөн ногоон орон сууцны зээлийн хүрээнд харилцагч 1.0 тэрбум хүртэлх төгрөгийн зээлийг 240 хүртэлх сараар зээлэх боломж бүрдсэн нь BestGER аргачлалыг зах зээлд нутагшуулж, ногоон барилгын зэрэглэл тогтоох, ногоон барилгыг эдийн засгийн эргэлтэд оруулж, эрэлтийг нэмэгдүүлэхэд чухал хөшүүрэг болж байгааг бизнес эрхлэгчид хэлж байсан.
Түүнчлэн Төрийн банк арга хэмжээний үеэр хүсэлт гаргасан бизнес эрхлэгчдэд ногоон харилцах данс нээж өгсөн бөгөөд тогтвортой хөгжлийг дэмжигч иргэн, аж ахуйн нэгжид зориулсан энэхүү харилцах дансыг зургаан сараас доошгүй хугацаанд ашигласнаар зарим төрлийн бизнесийн зээлд тогтоосон интервалын доод хүүгээр хамрагдах боломжтойгоороо давуу талтай юм.
Төрийн банк “Тогтвортой өсөлт, хамтын түншлэл” арга хэмжээг энэ оны есдүгээр сард анх зохион байгуулж, Монгол Улсын Ногоон таксономид тусгасан байгаль орчинд ээлтэй үйл ажиллагааны ангилал бүрд хамаарах 100 гаруй компанийн төлөөллийг нэгэн дор цуглуулж байсан. Харин энэ удаа дэд салбаруудад илүү хүртээмжтэй, үр дүнтэйгээр хүрч ажиллах зорилгоор ногоон барилгын салбарынхныг арга хэмжээнд хамрууллаа.
Цаашид хөдөө аж ахуй, эрчим хүч, тээвэр логистик, хог хаягдлын дахин боловсруулалт гэх мэт салбаруудад анхаарч, ногоон шийдэл санал болгогч бизнес эрхлэгчдийг шат дараатайгаар энэхүү арга хэмжээнд хамруулахаар төлөвлөж байна.
Итгэл төгс - Ногоон ирээдүй
Like
0
Зөв
0
0
Буруу
0
Воов
0
Уйтгартай
0
Дуртай
У.Хүрэлсүх: Уламжлалт анагаах ухааныг гүнзгийрүүлэн хөгжүүлэх, түгээн дэлгэрүүлэхийг ямагт дэмжинэ
© 2013-2023. Вэб сайт бүтээсэн: Tsast Solution LLC
