Л.Энх-Амгалан: МУИС, МҮИС нэрийн давхардал үүссэн нь оюуны өмчийн хулгай байна гэж хэлсэн минь үнэн

Дуулиан

0
1391

Л.Энх-Амгалан: МУИС, МҮИС нэрийн давхардал үүссэн нь оюуны өмчийн хулгай байна гэж хэлсэн минь үнэн

Төр.мн I www.tur.mn

2021-10-14

МУИС, МҮИС нэрийн маргаантай холбоотой асуудал олон намрыг өнгөрөөж байна. Гэвч өнөөдрийг хүртэл хоёр сургуулийн нэрийн маргаан нэг тийш шийдэгдээгүй. Үүнтэй уялдуулан хоёр сургууль хэд хэдэн удаа шүүдэлцээд авсан. Гэвч шүүхээр МУИС-ийн талд бус МҮИС-ийн талд шийдвэр гарсан гэж сургуулийн удирдлагууд тайлбар өгч байсан. Эл асуудлыг шийдвэрлэх үүднээс БШУ-ны сайд Л.Энх-Амгалан тайлбар хийж байсан. Тэрбээр МҮИС нэрийг хураан авахаа мэдэгдсэн. Гэвч МҮИС-ийн удирдлагуудын зүгээс Л.Энх-Амгалан сайдыг шүүхэд өгсөн. Тэгвэл эл хэрэгтэй холбоотой асуудлаар БШУ-ны сайд Л.Энх-Амгалан өөрийн цахим хуудсаараа дамжуулан "МҮИС-аас намайг "ХУЛГАЙЧ" гэж хэлсэн гэдэг үндэслэлээр цагдаад өгсөн юм байна. Гомдлын дагуу мөрдөн байцаагчид мэдүүлэг өглөө.

Тухайн үеийн Боловсролын сайдын 1992 оны оны 10 дугаар сарын 26-ны өдрийн “Үндэсний их сургуулийн статус олгох тухай” 476 дугаар тушаалаар Монгол Улсын Их сургуулийг “Монгол Улсын Үндэсний Их сургууль” хэмээн нэрлэсүгэй” гэж статусыг МУИС-д албан ёсоор олгосон.

Энэ нэр бол Монгол Улсын оюуны өмчийн газар, Монгол Улсын Төрийн хэлний зөвлөл, Шударга өрсөлдөөнийг зохицуулах газруудаар баталгаажсан МУИС-ийн өмч юм. Би Боловсрол, Шинжлэх ухааны сайдаар ажиллах хугацаандаа Монгол Улсын Их Сургуулийн нэрний давхардлын арилгах асуудлыг хуулийн хүрээнд шийдүүлж удахгүй нэг талд нь гаргана.

Би Монголын Үндэсний Их сургууль гэдэг тухайн байгууллагын нэр хүндэд халдаж буруутгаагүй. Хууль бусаар авсан нэрийг ашиглан ашиг орлого олох хэрэгсэл болгож байгааг буруутгасан. Дээр нь МУИС-ийн оюуны өмч болох нэрийг нь давхардуулж олгосон тухайн үеийн Боловсролын яамны албан тушаалтнууд, Улсын бүртгэлийн газрыг буруутгаж байгаа юм.

Нэрийн давхардал үүссэн нь оюуны өмчийн хулгай байна гэж хэлсэн минь үнэн. Түүнээс биш хэн нэгнийг хулгай хийсэн, хулгайч гэж хэлээгүй. Би ямар нэгэн хууль бус үйлдэл, буруу зүйл хийгээгүй учраас хэн нэгнээс уучлалт гуйх шаардлагагүй” хэмээн үзэж байгаагаа тэрбээр илэрхийлсэн байна.

Нийт сэтгэгдэл 0

! Анхаар! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд tur.mn сайт хариуцлага хүлээхгүй.