Цагдаагийн ерөнхий газрын Гэр бүлийн хүчирхийлэл хүүхдийн эсрэг гэмт хэрэгтэй тэмцэх хэлтсийн дарга, цагдаагийн хошууч Э.Баярбаясгалантай ярилцлаа.
-Гэр бүлийн хүчирхийлэлтэй холбоотой хэрэг цахим орчноо ихээр тавигдах боллоо. Цагдаагийн байгууллагад ирсэн дуудлага, мэдээллийн хувьд?
-Он гарсаар улсын хэмжээнд гэр бүлийн хүчирхийлэлтэй холбоотой 35 мянга 700 гаруй гомдол мэдээлэл ирсэн байна. Энэ нь өмнөх оны мөн үеэс 2 хувиар өссөн үзүүлэлт юм. Энэ бол нийт ирсэн дуудлагын тоо болон иргэдийн зүгээс бичгээр ирсэн өргөдлүүдийн нийлбэр тоо. Гэр бүлийн хүчирхийллийн 1305 гэмт хэрэг бүртгэгдсэн. Энэ нь өмнөх оны мөн үеэс 25 хувиар өссөн үзүүлэлт. Гэр бүлийн хүчирхийллийн зөрчил 8644 бүртгэгдсэн нь өмнөх оноос 16 хувиар өссөн байгаа юм.
-Хүчирхийлэлтэй холбоотой дуудлага мэдээлэл нэмэгдсэн нь иргэд хүчирхийллийг үл тэвчих хандлагатай болж нуугдмал хэрэг зөрчил ил болж байгаагийнх, нөгөө талаас нөлөөлж буй ямар хүчин зүйл байна вэ?
-Үүний шалтгааныг хэд хэдэн хүчин зүйлээс улбаатай гэж үзэж байна. Нэгдүгээрт, ковидын үеийн хөл хориотой шууд хамааралтай. Олон улсад ч мөн адил ковидын үед гэр бүлийн хүчирхийллийн гэмт хэрэг өссөн үзүүлэлттэй байна. Хаалттай хаалганы цаана хүчирхийлэл үйлдэгч болон хүчирхийлэлийн хохирогч хоёр нэг орчинд гэрчийн мэдээлэл өгөх боломж хязгаарлагдмал байсан. Нөгөө талаараа иргэдэд өгч буй мэдлэг мэдээллийн ачаар иргэдийн мэдээлэх үүрэг нэмэгдсэн. Хөршийн өгч буй дуудлагын тоо өсөж байгаа нь иргэдийн энэ талын мэдлэг, мэдээлэл тодорхой хэмжээнд нэмэгдсэнийг харуулж байна. Иргэдийн эрх зүйн мэдлэг сайжирч байгаа нь сайн хэрэг.
-Гэр бүлийн хүчирхийллийн хэргийг мэдээлж, дуудлага өгөхөөр эх сурвалжийг хэрэгт холбогдогчдод мэдэгдэх, үүнээс үүдэн гэрч сүрдүүлгэнд автах зэрэг тохиолдол байдаг шүү дээ?
-Зөрчил шалган шийдвэрлэх тухай хуульд өөрчлөлт оруулахаас өмнө дуудлага өгсөн хөндлөнгийн хүний мэдээллийг хүчирхийлэл үйлдэгч баривчлагдах үедээ хэргийн материалыг уншаад мэдчихдэг байсан. Тэгвэл зөрчил шалган шийдвэрлэх тухай хуульд өөрчлөлт оруулснаас хойш гэр бүлийн хүчирхийллийн зөрчил болон хүүхдийн эрхийг зөрчих зөрчлүүдэд зөрчил үйлдсэн этгээдэд эсвэл түүний өмгөөлөгчид хэргийн материалыг танилцуулахдаа хөндлөнгөөс мэдээлэл өгсөн хүний хувийн мэдээлэл болон өгсөн мэдүүлгийг нууцалдаг болсон. Ингэснээрээ мэдээлэгчийн аюулгүй байдал бүрэн утгаараа хангагдаж байгаа юм.
-Хүчирхийлэл хүн бүхэнд хамаатай. Гэтэл хүчирхийлэлд өртсөн гэхээр эмэгтэйчүүд гэж ойлгоод байдаг?
-Гэр бүлийн хүчирхийллийн хохирогчдын ихэнх нь эмэгтэйчүүд байдаг. Эрэгтэй хүмүүс гэр бүлийн хүчирхийллийг үл тэвчдэг байх чиглэлээр энэ жилийн Жендерт суурилсан хүчирхийллийн эсрэг аян"-ыг зохион байгуулсан. Гэхдээ энэ нь зөвхөн эмэгтэй хүн л гэр бүлийн хүчирхийлэлд өртдөг гэсэн үг биш. Цагдаагийн байгууллагад бүртгэгдэж байгаа хохирогчдын 85 хувь орчим нь эмэгтэйчүүд, 5-6 хувь нь эрэгтэйчүүд, үлдсэн хувь нь хүүхдүүд байдаг. Тиймээс энэ бол зөвхөн эмэгтэйчүүдийн эрхийг хамгаалах аян биш юм. Гэр бүлийн хүчирхийлэл хаалттай хаалганы цаана болдог учраас түүнийг илрүүлэх, иргэдийн мэдлэгийг өргөжүүлэх зорилготой.
Like
0
Зөв
0
0
Буруу
0
Воов
0
Уйтгартай
0
Дуртай
У.Хүрэлсүх: Уламжлалт анагаах ухааныг гүнзгийрүүлэн хөгжүүлэх, түгээн дэлгэрүүлэхийг ямагт дэмжинэ
© 2013-2023. Вэб сайт бүтээсэн: Tsast Solution LLC
