Эрхэм хүндэт үе үеийн цусны донорууд, донорын үйлсийг дэмждэг байгууллага хамт олон, ард иргэд, хамтран ажилладаг төрийн болон хувийн хэвшлийн эрүүл мэндийн байгууллагын нийт эмч, мэргэжилтэн, ажиллагсад та бүхэндээ Цусны донорын Дэлхийн өдрийн мэнд дэвшүүлье.
2021 оны Цусны донорын Дэлхийн өдрийн ёслолын арга хэмжээ Итали улсын Ром хотод “Цусаа бэлэглэж, цохилох зүрх бүхнийг аваръя” уриан дор зохион байгуулагдаж байна.
Монгол улсын хувьд Цус сэлбэлт судлалын үндэсний төв болон орон нутгийн Цусны салбар төвүүд улс орон даяар энэхүү арга хэмжээг Коронавируст халдвар (Ковид-19) цар тахлын нөхцөл байдалтай холбоотой цахим хэлбэрээр зохион байгуулж байна.
Өнөөдрийн байдлаар Монгол улсад 160 мянга гаруй цусны донор бүртгэлтэй байгаагаас 36 мянга гаруй нь тогтмол хугацаанд цус, цусны бүрэлдэхүүн хэсгээ бэлэглэж байна. Улсын хэмжээнд 35 буюу түүнээс дээш удаа цусаа бэлэглэсэн нийт 2673 Хүндэт донор байна.
Коронавируст (Ковид-19) халдвар цар тахлын улмаас тогтоосон удаа дараагийн хөл хорио, бүх нийтийн вакцинжуулалттай холбоотой үүссэн нөхцөл байдлын улмаас цусны донорын тоо буурч цус цусан бүтээгдэхүүний нөөц хомсдох эрсдэл үүсч байгаа ба цусны албаны зүгээс хариу арга хэмжээний төлөвлөгөөг боловсруулан хэрэгжүүлснээр хүн амын эрүүл мэндийг сахин хамгаалах үүргээ нэр төртэй биелүүлж ирлээ.
Цус сэлбэлт судлалын үндэсний төвөөс цар тахал болон улирлын хамааралтай цусны нөөц буурахаас урьдчилан сэргийлэх, авлагагүй сайн дурын цусны донорын үйлсийг сурталчлан таниулах зорилгоор хувь хүн, иргэд байгууллага хамт олонд хандсан сургалт сурталчилгааны ажлыг эрчимжүүлэх “ЦУСАА БЭЛЭГЛЭЖ, ЦОХИЛОХ ЗҮРХ БҮХНИЙГ АВАРЪЯ” 3 САРЫН АЯН”-ыг хэрэгжүүлж байгаа бөгөөд та бүхнийг цусны донорын үйлсэд нэгдэхийг уриалж байна.
ЦССҮТ-ийн Ерөнхий захирал, АУ-ны доктор, дэд профессор Н.Эрдэнэбаяр
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
