Фридрих Эбертийн сан, Монголын Үйлдвэрчний эвлэлийн холбоо, Шударга өрсөлдөөн, хэрэглэгчийн төлөө газраас хамтран “Хөдөлмөрийн харилцаан дахь Үйлдвэрчний эвлэлийн оролцоо, чадавхийг сайжруулах нь” сургалтыг Баян-Өлгий аймагт энэ сарын 18-19-ний өдрүүдэд амжилттай зохион байгууллаа. Энэхүү сургалтад ШӨХТГ-ын орон тооны гишүүн О.Батмөнх оролцож ШӨХТГ-ын үүрэг чиглэл, үнийн өсөлттэй холбоотой хийж хэрэгжүүлсэн ажлуудын талаар танилцуулга мэдээлэл хийлээ.
Сургалтын үеэр шинэчлэн батлагдсан Хөдөлмөрийн тухай хууль, нийгмийн түншлэл, хөдөлмөрийн харилцаа ба Үйлдвэрчний эвлэлийн оролцоо, хөгжлийн хөтөлбөр, үнийн өсөлт ба инфляц зэрэг сэдвийн хүрээнд илтгэгч багш нар мэдээлэл хийлээ. Уг сургалтад Ховд, Увс, Баян-Өлгий аймгийн Үйлдвэрчний эвлэлийн анхан шатны хорооны дарга нар оролцож туршлага солилцож, орон нутгийн түвшинд тэдэнд тулгамдаж буй асуудлын талаар санал бодлоо илэрхийлж, цаашид ажиллах чиглэл, төлөвлөгөөний загварыг боловсрууллаа.
Мөн ШӨХТГ-аас өнгөрөгч 8 дугаар сард аймгуудын ИТХ-ын дарга нарт тухайн орон нутагт өрсөлдөөнийг дэмжих, хэрэглэгчийн эрхийг хамгаалах чиглэлээр үйл ажиллагаа явуулах Үйлдвэрчний эвлэл, Худалдаа аж үйлдвэрийн танхим, хэрэглэгчийн эрхийг хамгаалах үйл ажиллагаа явуулж байгаа төрийн бус байгууллагын төлөөллүүдийг оролцуулсан орон тооны бус зөвлөл байгуулж дэмжлэг үзүүлэн ажиллах талаар санал хүргүүлсэн. Энэ ажлын хүрээнд Баян-Өлгий аймгийн Иргэдийн Төлөөлөгчдийн хурлын даргатай уулзсан бөгөөд аймгийн удирдлагын зүгээс аймгийн ИТХ-ын дэргэд орон тооны бус зөвлөл байгуулж, хамтран ажиллахаа илэрхийллээ.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
