БШУ-ы сайд Л.Энх-Амгалан 2021 оны наймдугаар сарын 26-нд хэвлэлийн бага хурлын үеэр, “Бид МҮИС гэдэг нэрээ буцааж авах хоёр үндэслэлтэй. Нэгдүгээрт, “Mongolian National University” нэрээр гадаадад явахад манай, их дээд сургуулиудын эрэмбийг хамгийн ихээр хойш нь татаж байгаа. Хөдөө орон нутгийн оюутнууд хотод ирэхэд МУИС, МҮИС-ийн алинд нь орж буйгаа мэдэхгүй, төөрөгдөл үүсэж байгаа. Тиймээс энэ нэрээ буцааж авна. Энэ бол Монголын төр, ард түмний өмч мөн. Хоёрдугаарт, УИХ-д өргөн барьсан Дээд боловсролын тухай хуульд ямар нэгэн байдлаар “Монголын Үндэсний.... хэмээх нэрийг авахыг хориглож байгаа” гэж хариулжээ.
МҮИС-аас “… энэ мэдээлэл олон нийтийн мэдээллийн хэрэгслээр тараагдснаар сургуулийн нэр хүндийг гутаасан” гэж БШУЯ-нд “Ажил хэргийн нэр хүндийг сэргээлгэх, уучлалт гуйх, мэдээлэл тараасан хэлбэрээр няцаалт хийхийг даалгах” нэхэмжлэлийг шүүхэд гаргасан. Харин яам уг нэхэмжлэлээс татгалзаж, “ … Үндэсний гэх статустай их сургууль нь төрийн өмчийн сургууль байх ёстой. МУИС, МҮИС гэх нэрийн давхардал нь гадаад харилцаанд болон хэрэглэгчдийг төөрөгдүүлж байсан. МУИС, МҮИС товчлол нь бичвэр болон дуудлагын төсөөтэй, латин галигт “МUIS” гэж ижил бичигддэг” гэх зэргээр маргав.
Хэрэгт авагдсан баримтаар, МҮИС нь БСШУ-ны сайдын 2002 оны хоёрдугаар сарын 06-ны 39 дүгээр тушаалаар “Монголын Үндэсний коллеж”-ийн ангилал, 2004 оны долдугаар сарын 20-ны 238 дугаар тушаалаар “Монголын Үндэсний дээд сургууль”-ийн ангилал, 2012 оны наймдугаар сарын 26-ны А/454 дүгээр тушаалаар “Монголын Үндэсний их сургууль”-ийн ангилал авч байжээ.
Монгол Улсын Төрийн хэлний зөвлөлийн хэл шинжлэлийн дүгнэлтэд “...“National University of Mongolia”, “Mongolian national university” гэсэн хэллэгүүдийн үгийн бүрэлдэхүүн болон дуудлага ижил үгсийн байрлал өөр тул авиазүйн талаар төөрөгдүүлэх боломжгүй. “Монгол Улсын” гэсэн хэллэг нь тус сургууль төрийн өмчийн байгууллага болохыг илэрхийлж байна. “Монголын Үндэсний” гэсэн хэллэгийг Монгол Улсад бүртгэлтэй төрийн болон төрийн бус ямар ч байгууллага хэрэглэж болно. Нэрийн товчлол болох МУИС, МҮИС нь бусдыг төөрөгдүүлэх үндэсгүй, МУИС ба МҮИС-ийн бэлгэ тэмдэг, логонууд нь эрс өөр байна.
Түүнчлэн, Монголын Үндэсний их сургуулийн нэр нь Өрсөлдөөний тухай хуулийн “Өрсөлдөөнийг хязгаарлахад чиглэсэн үйл ажиллагаа” гэсэн 12 дугаар зүйлийн 12.1.4 дэх хэсгийн “Бусдын барааны тэмдэг, аж ахуй эрхлэгчийн нэр барааны чанарын баталгааг дур мэдэн хэрэглэх, барааны оноосон нэр, баглаа боодлыг хуулбарлах”-ыг хориглосон заалтыг зөрчөөгүй байна” гэжээ.
Иймээс Иргэний хэргийн анхан шатны шүүхээс, хариуцагч яам нь “МҮИС нэрийг үндэслэлгүй авсан, нэр нь төрийн өмч учраас буцааж авна, МУИС, МҮИС гэх нэр бичвэр болон дуудлагын хувьд төсөөтэй, нэрийн давхардал нь гадаад харилцаанд болон хэрэглэгчдийг төөрөгдүүлсэн” гэх мэдээллийхээ үнэн зөвийг нотолж чадаагүй тул МҮИС-ийн ажил хэргийн нэр хүндийг сэргээж, нэхэмжлэгчээс уучлалт гуйх, мэдээлэл тараасан хэлбэрээр няцаалт хийхийг яаманд даалгаж шийдвэрлэсэн байна.
Like
0
Зөв
0
0
Буруу
0
Воов
0
Уйтгартай
0
Дуртай
Г.Занданшатар: Хүн сольсноор асуудал шийдэгдэхгүй, тогтолцоогоор нь авч үзэх хэрэгтэй
© 2013-2023. Вэб сайт бүтээсэн: Tsast Solution LLC
