2019 онд тухайн үеийн УИХ-ын дарга М.Энхболдыг огцруулахаар тэмцсэн "ШУДАРГА ТАВ"-ыг санаж буй биз ээ. Тодруулбал, одоогийн Ерөнхий сайд Л.Оюун-Эрдэнэ, ХЗДХ-ийн сайд Х.Нямбаатар, ХНХ-ын сайд Т.Аюурсайхан, УИХ-ын гишүүн асан Лу.Болд, Ж.Батзандан нар билээ. Эдгээрээс харахад, 3 нь сайд, 1 нь Элчин сайд болсон. Харин Ж.Батзандан хуулийн байгууллагад шалгагдаж яваа. 

Тэгвэл өчигдөр /2022.12.13/ АТГ-аас "НҮҮРСНИЙ ХУЛГАЙ"-д холбогдсон гэх 17 хүний нэрийг зарласан. Эдгээрээс Н.Наранбаатар, Ц.Анандбазар, Б.Баттөмөр, Ц.Сэргэлэн, Ш.Раднаасэд нарын УИХ-ын гишүүд АТГ-ын гадаа мэдээлэл хийв. Тэд "ЖИГТЭЙХЭН ЦЭВЭР" амьтад бололтой. Иргэдтэйгээ нэгдэн тэмцэж, ХУЛГАЙЧДЫГ илрүүлнэ. Тэр бүү хэл, "Илрүүлсэн хөрөнгөөр иргэдийн "ИПОТЕКИЙН ЗЭЭЛ"-ийг төлүүлнэ" гэнэ шүү. Дараагийн "ШУДАРГА ТАВ" гарч ирсэн бололтой. Тэд юу хэлэв?

Ц.Анандбазар: Огт хамаагүй гишүүдийн нэрийг зарласан нь их авьяас байх

-Монголын ард түмэн ядуу амьдралтай байхад ийм том хулгай байж болохгүй. Цаашид удаан үргэлжлэх байх. Бид тав нэр төрөө сэргээлгэж авъя гэж бодож байгаа. Ард түмэнтэйгээ нийлнэ. Тэгээд нүүрсний хулгайч нарыг бүгдийг нь илрүүлнэ. Нүүрсний хулгайн мөнгөөр иргэдийн ипотекийн зээлийг төлүүлнэ. Ийм хуулийн төслийг ирэх жил өргөн барина. Нүүрсний хэрэгтэй огт хамаагүй гишүүдийн нэрийг зарласан нь их авьяас байх гэж бодож байна. Бид тав дотор нүүрстэй холбоотой хүн байхгүй. Долдугаар ангиасаа хойш нүүрсний талаар мэдэхгүй гэж хэлснийг зарим хүн инээдэм болгож байна. Бизнес эрхэлдэг хүнд эрхэмлэдэг зан чанар, нандин зүйл гэж бий. Би өөрөө бурхны шашинтай. Хулгай гэдэг зүйлийг үнэхээр үзэн яддаг. Тиймээс ард түмэнтэйгээ нийлээд нүүрсний хулгайг илрүүлэх бүлэг байгуулна.

Б.Баттөмөр: Тэр хулгай нүүрлэчихсэн "Эрдэнэс Тавантолгой"-н оффис хаана байдгийг ч мэдэхгүй

-Би нам дотроосоо хамгийн анх авлигал гэдэг зүйлийг ярьж, гаргаж тавьж байгаа хүн. Авлигал хаана их байна, тэнд хөгжил сул байдаг. Монголын авлигал ардчилагдсан буюу ил тод болчихсон гэдгийг би анх хэлсэн. Мөн миний ярьдаг нэг зүйл бол далд эдийн засаг. Монгол Улсын эдийн засагтай тэмцэх хэмжээний далд эдийн засаг урд хил дээр байна гэж Ерөнхий сайд ч хэлсэн. Энэ бол үнэн. Ийм далд эдийн засаг дотор нүүрсний хулгай байгааг ил болго гэж би байнга ярьдаг. Гэтэл надад үүний төлөө сануулга өгөх гэж байгаа юм уу гэмээр энэ асуудалд миний нэрийг холбож байна. Би Тавантолгой гэдэг газрыг хаана байдгийг ч мэдэхгүй. Хэрвээ очихоор бол хүнээр л заалгаж очно. Тэр хулгай нүүрлэчихсэн Эрдэнэс Тавантолгойн оффис хаана байдгийг ч мэдэхгүй. Захирал Б.Ганхуяг гэж хүнийг нь зүгээр л зүс танина. Түүнээс биш уулзаж байгаагүй. Надад хийсэн гэрээ байхгүй, би машин явуулдаггүй. Яагаад би үүнд холбогдчихсоныг мэдэхгүй байна.

Н.Наранбаатар: Миний хөрөнгө, орлого өссөн юм байхгүй

-Би өнгөрсөн дөрвөн жил Өмнөговь аймгийн Засаг даргаар ажиллаж байсан. Өмнөговь аймагт Тавантолгойн уурхай үйл ажиллагаагаа явуулдаг, Гашуунсухайт, Шивээхүрэнгийн боомт байдаг болохоор намайг холбоотой байж магадгүй гэж нэр оруулсан байх. Би эдгээртэй ямар ч холбоо байхгүй.

Ганболд гишүүнээр ахлуулсан Түр хорооны хаалттай хуралдаанд ороод гараад ирсэн миний нэрийг зарласан байна лээ. Бодвол төв талбай дээр жагсаж байгаа иргэдийг нэр гаргаж ир гэхээр хаяж байгаа байлгүй гэж харж байгаа. Дуудаж, асуусан, холбогдсон юм байхгүй. Одоо АТГ руу орж асууя. Миний хөрөнгө, орлого өссөн юм байхгүй.

Ш.Раднаасэд: Өмнө нь олон удаа ийм юм болсон. Энэ бол танил сценар

-Гэм зэмгүй, дарга нарыг дагаж далжганадаггүй, таныг дэмжиж байна гэж илүү дутуу юм ярьж өрөө тасалгаагаар нь орж явдаггүй. Номхон тэмээг ноолоход амар гэдэг шиг бидний нэрийг зарлаж байна. Миний авсан мэдээллээр прокурор болон хуулийн байгууллагаас нэр гараагүй. Энэ бол намаас өгсөн нэр юм байна. Үүний учир байдлыг нэр зарласан хүмүүсээс нь бид орж шалгая, ямар учиртай зүйл болоод байгааг нь асууя. Бодит үнэнийг шалгах гэж байгаа бол шалга. Харин шалгаж чадахгүй бол АТГ өөрөө татан буугдах ёстой.

Талбай дээр 8, 9 хоног зогсож байгаа ард иргэдийн уурыг намжааж, жагсаалыг тараахын тулд нэр зарласан болж байгаа бол эндүүрч байна. Өмнө нь олон удаа ийм юм болсон. Энэ бол танил сценар. Хөөн хэлэлцэх хугацаа, өмд гутал, ЖДҮ гэх мэт. Би үүнтэй холбоогүй. Тэр болгонд дуугүй байсан. Цаг хугацаа үнэнийг харуулах болов уу гэж бодож явдаг байсан. Одоо бол хэтэрч байна. Аливаа юманд хязгаар гэж байдаг. Тиймээс энэ байдлыг тодруулъя гэж АТГ-т бид ирж байгаа.

Ийнхүү сүржин мэдэгдэл хийж, дараагийн "ШУДАРГА ТАВ" дэвэн дэвсээр гарч ирлээ.