Хоймор нутаг Хөвсгөл аймагт УИХ-ын сонгуулийн гурван мандат ногдож буй. 133879 хүн амтай тус хөвсгөлчүүдийн 85597 нь санал өгөх насных. /2019.12 сарын байдлаар/

МАН-аас УИХ-ын дэд дарга Л.Энх-Амгалан нэр дэвшихээр бэлтгэлээ хангажээ. Тэрбээр энэ парламентын хугацаанд сөхөгдөж, олны дургүйцлийг хүргэсэн ЖДҮХС-гаас зээл авсан асуудалтай мөн л нэр холбогдсон. Л.Энх-Амгалан гишүүнийг \"Үрийн төмсний загвар аж ахуй байгуулах”, Хөвсгөл аймгийн Их-Уул сумын \"Буман сор” хоршооны \"Хөргүүртэй агуулах”,  Хөвсгөл аймгийн Тосонцэнгэл сумын \"Ардын цэнгэл” хоршооны \"Сайн тэжээл” гэх гурван төслийг дэмжүүлэхээр 2018 оны дөрөвдүгээр сард ХХААХҮ-ийн сайд Б.Батзориг, ЖДҮХС-гийн захирал С.Төгсбилэг нарт албан бичгээр хандсан хэмээж байв. Мань хүн хариуд нь олон нийтийн сүлжээгээр цацсан \"Төмсчин хүү, ЖДҮ бид гурав” нэртэй тайлбартаа \"Миний нэр Хөвсгөл аймгийн Тосонцэнгэл сумын төмсчин хүүтэй нэр холбогдсон бололтой. Үнэн нь энэ хүү миний нэр дээр өргөдөл өгч Төмсний үрийн агуулах барих, төмс тариалах төслөө ЖДҮХС-д өгөхөөр шийдсэнээ бичээд, албан бичгээр дэмжихийг хүссэн юм. Би дэмжсэн бичиг явуулсан. Төмсчин хүүгийн төсөл 200 сая төгрөгөөр дэмжигдсэн нь нүдээ олсон. Гэвч дэмжигдсэнийг нь сүүлд мэдсэн. Энэ тухай АТГ-аас надад мэдэгдэж, мэдүүлэг авсан... Хувийн ашиг сонирхол, нийтийн ашиг сонирхол хоёрын дунд асар том орон зай бий. Түүнийг олж харж чаддаггүй АТГ-д талархал илэрхийлье. Нэр хугарахаар яс хугар...” гэж бичсэн байдаг.

Түүнээс хойно буюу өнгөрсөн хоёрдугаар сард  Exclusive компанийн захирал Г.Майцэцэгт барьцаагүй, хүүгүй 60 сая төгрөгийн зээл өгсөн байна. Гэвч зээлээ өнөөдрийгхүртэл авч чадахгүй байгаа тухайгаа бичсэн. Харин Г.Майцэцэг нь тухайн үеийн тэрхүү мөнгөөр оёдлын үйлдвэр барьж, хөвсгөлчүүд оёдолчин, засварчин болоход өөрийн зүгээс үнэтэй хувь нэмрээ оруулсан төдийгүй Л.Энх-Амгалан гишүүн өөрийг нь гүтгэж байна хэмээн цахим орчинд \"тунхагласан”. Энэ мэтчлэн MCS том группын эздийн нэг Л.Энх-Амгалантай холбоотой мэдээлэл хөвөрсөөр байна. Юутай ч тэрбээр аймагтаа ажлын байр нэмэгдүүлнэ хэмээж өмнөх сонгуулиар ам алдсан нь мань хүнийг Г.Майцэцэг гэгч эмэгтэйтэй \"үзэлцэх” нөхцөлийг үүсгэсэн бололтой. Өдгөө энэ хэргийг хуулийн байгууллагад шалгаж байгаа. Харин хөвсгөлчүүд Л.Энх-Амгалан гишүүндээ хэр итгэл үзүүлдэг болох нь эн удаагийн сонгуулиар харагдах байх.

Хөвсгөлийн гурван мандатын нэгийг УИХ-ын гишүүн, Эрчим хүчний сайд Ц.Даваасүрэн аль хэдийн халааслачихсан. Тэрбээр Засгийн газрын гишүүний давуу байдлаа ашиглан Хөвсгөл аймаг руугаа \"жим” татаж, зам гартал явсан нь яамных нь санхүүгийн тайлангаас харагддаг. Бас ч хоосонгүй эрчим хүчний хөрөнгө оруулалтуудыг харамгүй цацсан мань хүн хуучин тойрогтоо бие дааж хүртэл нэр дэвшин, ялалт байгуулж явсан учраас нутагтаа дархлагдсан нэгэн гэж хэлж болохоор болжээ.

УИХ-ын гишүүн Л.Мөнхбаатар намаасаа нэр дэвших эрхээ өвөртөлж чадвал аймагтаа алзахгүй гэгддэг. Гэхдээ МАН-ыг энэ удаа намнах боломж болсон ЖДҮХС-гаас \"Аёон пропортийз” компанидаа зээл авсан гэх мэдээлэл гарсан түүний нэр хүндийг унагаад амжсан. МАН ганц тойрогт санаахрахгүй гэж үзвэл парламентад байгаа эсэх нь мэдэгдэхгүй явсан Л.Мөнхбаатартыг Хөвсгөл рүү нь \"явуулж” магадгүй.

АН-аас энэ удаа Хөвсгөлд нэр дэвших хүмүүсийн сураг тун бүрхэг байгаа. Учир нь Ц.Оюунгэрэлийн нэр дуулдаж байсан ч тэрбээр сонгуулийн багийн ард ажиллаж, ялсан тохиолдолд Хотын дарга болно гэх том тохироо хийсэн гэж байгаа.

Тиймээс АН-ынхан шинэ төрх бий болгохоос аргагүйд хүрсэн. Тэдний нэг нь  Г.Мөнгөнхуяг гэх залуу. Хөвсгөл аймгийн АН-ын бүлгийн дарга, Барилгын хөгжлийн төвийн хэлтсийн дарга, \"Урагшлах” ХХК-ийн гүйцэтгэх захирал.

Харин нэг мандатыг нь  \"Хөвсгөл далайн эзэд” ТББ-ын тэргүүн Б.Баярмаа төвөггүйхэн авна гэж байгаа аж. Олон нийтэд танигдсан Хөвсгөл далайн төлөө хийж бүтээсэн зүйл ихтэй Б.Баярмааг ҮБХ-ноос ч бүдрэхгүйгээр гараад ирнэ хэмээж байгаа ажээ. 

эх сурвалж: erennews.mn