Ерөнхийлөгчийн шав тавьсан эмнэлгийн барилгын газрыг АТГ “олж иржээ”

Төр.мн I www.tur.mn

2025-01-14

Монгол Улсын Ерөнхийлөгч У.Хүрэлсүх энэ оны 1 дүгээр сарын 6-ны өдөр “Хавдар судлалын үндэсний хоёрдугаар төв”-ийн барилгын шавыг тавьсан билээ.

Ерөнхийлөгчийн ивээл дор бүтээн байгуулах Хавдрын эмнэлэг 2030 онд ашиглалтад орох бөгөөд Сонгинохайрхан дүүргийн 34-р хорооны нутаг дэвсгэр дэх Баянголын амны зүүн энгэрт ажлаа эхлүүллээ.

Нэг сонирхолтой баримт байгаа нь, энэхүү эмнэлгийг барих газрыг АТГ-ын мөрдөн шалгах ажиллагааны явцад хууль бусаар олгогдсон болохыг илрүүлж, хураан авч, улмаар төрд буцаах шүүхийн шийдвэр гарсан юм байна. 2005 онд УИХ-ын гишүүн Т.Бадамжунайн нэр дурдагдсан албан бичгийн дагуу түүний хүргэн Э.Жаргалсайханд анх 100 га газар олгогдсон байдаг. Дараа нь захирамждаа өөрчлөлт оруулан 72 га болгон өөрчилсөн байна.

Улс төрд нөлөө бүхий этгээдийн хүргэний эзэмшиж байсан 72 га газрын зарим хэсэг нь гадаадын хөрөнгө оруулалттай компанид очсон бөгөөд тэрхүү мөнгөөрөө банк бус санхүүгийн байгууллага байгуулж мөнгө угаасан байж болзошгүйг АТГ илрүүлсэн байна.

Нэгэнт хууль бус, гэмт хэргийн шинжтэй үйлдэл тогтоогдсон учраас АТГ хохирол нөхөн төлүүлэх зорилгоор ажиллагаа явуулснаар одоо Хавдрын эмнэлэг баригдаж байгаа газрыг төрийн мэдэлд шилжүүлээд байна.

Нийт сэтгэгдэл 0

! Анхаар! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд tur.mn сайт хариуцлага хүлээхгүй.